Presidentja Vjosa Osmani takohet me drejtorin gjerman për Ballkanin Perëndimor, Michael Reiffenstuel
Presidentja e Kosovës, Vjosa Osmani, zhvilloi një takim me Drejtorin për Ballkanin Perëndimor në Ministrinë e Punëve të Jashtme të Gjermanisë, Michael Reiffenstuel, ku diskutuan zhvillimet aktuale në Kosovë dhe rajon, me fokus të veçantë te procesi i konstituimit të Kuvendit të Kosovës.
Në këtë takim, Presidentja Osmani theksoi gatishmërinë e Kosovës për bashkëpunim të ngushtë me Qeverinë e Kancelarit gjerman, Olaf Scholz, dhe vlerësoi rolin jetik të Gjermanisë në mbrojtjen e vlerave demokratike, unitetit transatlantik dhe sigurisë evropiane.
“Gjermania ka qenë dhe mbetet shtyllë strategjike për Kosovën në ruajtjen e stabilitetit rajonal dhe avancimin e rrugës euroatlantike të vendit tonë,” tha Osmani, duke kërkuar gjithashtu mbështetje për integrimin ndërkombëtar të Kosovës, me theks të veçantë në anëtarësimin në Këshillin e Evropës dhe NATO-n.
Në lidhje me dialogun me Serbinë, Presidentja vuri theksin te nevoja për qartësi strategjike, afate të përcaktuara dhe objektiva konkrete, duke theksuar se normalizimi duhet të nënkuptojë njohjen reciproke dhe respektimin e integritetit territorial dhe rendit kushtetues të Kosovës. Ajo kërkoi gjithashtu mbështetje nga Gjermania për heqjen e masave të padrejta ndaj Kosovës.
Gjatë takimit u diskutua edhe për mënyrat konkrete të bashkëpunimit bilateral, ku u konfirmua se këto vizita dhe takime në nivel të lartë do të ndihmojnë në arritjen e objektivave të përbashkëta për forcimin e pozitës së Kosovës në arenën ndërkombëtare dhe zhvillimin ekonomik.
Ky takim nënvizon rëndësinë e bashkëpunimit të vazhdueshëm midis Kosovës dhe Gjermanisë në rrugën e integrimeve euroatlantike dhe forcimin e stabilitetit në rajon.
